БАҚ ҮШІН ХАБАРЛАМА
«Jańa Dala / Green Day ‘2025» көрмесінде алғаш рет Starlink спутниктік интернеті қолданылады
14.07.2025 ж.
2025 жылғы 17–18 шілде күндері Қазақстанда өтетін «Jańa Dala / Green Day ‘2025» арнайы көрме-демонстрациясында спутниктік Starlink интернеті пайдаланылатын болады.
Starlink терминалын «Qazaq Aqbas» республикалық палатасы орнатады. Бұл интернет жүйесі қазақтың Ақбас тұқымды ірі қарасы бойынша өтетін плембұқалар аукционы мен «Ең үздік бұқа» аталымы бойынша Ұлттық байқаудың тікелей эфирін қамтамасыз етуге мүмкіндік береді.
Qazaq Aqbas мамандарының айтуынша, бүгінгі таңда мал шаруашылығымен айналысатын кәсіби фермерлер үшін интернеттің тұрақтылығы мен жоғары жылдамдығы – Дала күні аясында ғана емес, күнделікті жұмыс барысында да аса маңызды. Әсіресе шалғайда орналасқан шаруашылықтар үшін бұл – шешуші фактор. Осы талаптарға дәл жауап беретін шешім – Starlink.
Көрме Ақмола облысы, Целиноград ауданы, Нұресіл ауылындағы «Ақтық» агрофирмасының демонстрациялық алқабында өтеді (Астана қаласынан 20 км, Талапкер елді мекенінен кейін).
«Jańa Dala / Green Day» Дала күні форматы бойынша өткізілетін бұл форум 2013 жылдан бері ұйымдастырылып келеді және Қазақстандағы ең ауқымды демонстрациялық алаң ретінде танымал. Мұнда заманауи ауыл шаруашылығы техникалары, аграрлық технологиялар мен инновациялық шешімдер таныстырылады.
2025 жылғы көрмеге 20-дан астам елден 200-ден астам компания мен АӨК саласының 5 мыңнан астам кәсіби маманы қатысады деп күтілуде. Франция, Ұлыбритания және Нидерланды сынды алдыңғы қатарлы елдердің ұлттық павильондары таныстырылады.
Франция — көрменің ресми серіктесі ретінде қатысады.
Көрме бағдарламасында:
- Ет бағытындағы ірі қара мал тұқымдары бойынша Ұлттық байқау. «Jańa Dala / Green Day ‘2025» аясында «Ең үздік бұқа» аталымы бойынша Абсолют чемпион анықталады;
- Стейк фестивалі — Black Angus, Qazaq Aqbas, QALMAQ Meat, Столичная трапеза компанияларының қатысуымен байқаулар мен мастер-кластар;
- Ауыл шаруашылығы жануарлары көрмесі мен аукциондары: Ангус, Әулиекөл, Герефорд, Қазақтың ақбас және Қалмақ тұқымдары ұсынылады;
- «Жәндіктер арқылы өсімдіктерді биологиялық қорғау» семинары аясында шмельдер демонстрациясы;
- «Табысты гектар» байқауының нәтижелері мен тәжірибелік телімдердің таныстырылымы — микротыңайтқыш өндірушілер мен жеткізушілер арасындағы жарыс;
- Қазақстан ветеринарларының алғашқы Құрылтайы (съезі) — ұйымдастырушылар: ҚР АШМ Ветеринарлық бақылау және қадағалау комитеті, «Қазақстан ветеринарлар палатасы» РҚБ, «Құс өсірушілер одағы» және республикалық мал тұқымдары палаталары;
- Ауыл шаруашылығы дрондарының жұмысын көрсету;
- Жол талғамайтын көліктер мен пикаптардың тест-драйвтары;
- Плембұқалар аукционы;
- 2025 жылғы Ұлттық ауыл шаруашылығы санағы қалай өтеді? — Ақмола облысы бойынша Ұлттық статистика бюросының түсіндірмесі.
«Jańa Dala / Green Day ‘2025» арнайы көрме-демонстрациясының ұйымдастырушысы — «EXPO TIME» компаниясы — Қазақстандағы АӨК саласындағы жетекші халықаралық көрмелер ұйымдастырушысының бірі.
________________________________________________
«Jańa Dala / Green Day» ақпараттық орталығы
Ринат Тасбулатов, 8 701 460 91 82
e-mail: Адрес электронной почты защищен от спам-ботов. Для просмотра адреса в вашем браузере должен быть включен Javascript.
https://www.instagram.com/jana_dala_greenday/
